ਨਾ ਕੋਈ ਤਾਰਾ ਤੇਰੇ ਵਰਗਾ ਲੱਗੇ
ਕਿਹੜਾ ਤਾਰਾ ਮੇਰੇ ਸਿਰ'ਤੇ ਹੱਥ ਧਰੇ ?
ਨਾ ਕੋਈ ਫੁੱਲ ਤੇਰੇ ਵਰਗਾ ਲੱਭੇ
ਸੋਗੀ ਸੋਗੀ ਦਿਲ ਵਿੱਚ
ਕਿਹੜਾ ਰੰਗ ਭਰੇ ?
ਵਿਦਿਆ ਹੋ ਕੇ,ਤੈਨੂੰ ਮੈਂ ਕਈ ਵਾਰ ਮਿਲੀ
ਕੇਹਾ ਤੂੰ ਹੋਇਆ ਵਿਦਿਆ!ਮੁੜ ਕੇ ਆਇਆ ਨਹੀਂ
ਮੇਰੇ ਅੰਦਰੋਂ ਖੁਸ਼ੀਆਂ ਦਾ ਰੁੱਗ ਲੈ ਤੁਰਿਆ
ਇੰਜ ਗਿਆ ਫਿਰ ਕੋਈ ਫੇਰਾ ਪਾਇਆ ਨਹੀਂ
ਆਪ ਤਾਂ ਸੱਚੇ ਬਾਬਲ ਕੋਲੇ ਜਾ ਬੈਠੋਂ
ਆਪਣੀ ਜਾਈ ਦਾ ਕੀ ਖਿਆਲ ਵੀ ਆਇਆ ਨਹੀਂ?
ਤੇਰੇ ਵਿਹੜੇ ਗੰਗਾ ਜਮਨਾ ਵਹਿਣਗੀਆਂ
ਧਰਮੀ ਰਾਜੇ! ਇਹ ਵੀ ਚੇਤਾ ਆਇਆ ਨਹੀਂ
?
ਕਦੀ ਲੱਗੇ ਤੂੰ ਚੰਦ ਦਾ ਰੂਪ ਵਟਾ ਬੈਠਾ
ਰਿਸ਼ਮ ਕੋਈ ਫਿਰ ਕਿਉਂ ਨਾ ਤੇਰੀ ਗੱਲ ਕਰੇ ?
ਕਦੀ ਲੱਗੇ ਤੂੰ ਰੁੱਖ ਬਣ ਵਿਹੜੇ ਆ ਬੈਠਾ
ਕਿਉਂ ਨਾ ਕੋਈ ਪੱਤਾ
ਤੇਰੀ ਹਵਾ ਦਵੇ ?
ਲੱਭਦੀ ਨਹੀਂ ਛਾਂ ਤੇਰੀ,ਛਾਵਾਂ ਟੋਲ ਚੁੱਕੀ
ਨਹੀਂ ਦਿਸਦਾ ਮੁੱਖ ਤੇਰਾ
ਅੰਬਰ ਫੋਲ ਚੁੱਕੀ
ਬਾਬਲ! ਤੇਰੇ ਵਰਗਾ
ਪਿਆਰ ਥਿਆਉਣਾ ਨਹੀਂ
ਤੇਰੀ ਕੂੰਜ ਨੂੰ ਪਾਣੀ ਕਿਸੇ ਪਿਆਉਣਾ ਨਹੀਂ
ਵਾਂਗ ਤੇਰੇ ਹਿੱਕ ਨਾਲ ਕਿਸੇ ਨੇ ਲਾਉਣਾ ਨਹੀਂ
ਜੀਅ ਕਰਦੈ ਤੂੰ ਆਵੇਂ,ਪਰ ਤੂੰ ਆਉਣਾ ਨਹੀਂ.........।
