ਕੋਈ ਉਸ ਸੁਰੰਗ ਦਾ ਸਿਰਨਾਵਾਂ ਤਾਂ ਦੱਸੇ
ਜਿਸ ਵਿੱਚੋਂ ਗੁਜ਼ਰਦਿਆਂ
ਸਾਂਵਲਾ ਚੰਦ ਗੋਰਾ ਨਿਛੋਹ ਹੋ ਜਾਂਦਾ ਹੈ
ਤੇ ਤਾਰੇ
ਕਿਸੇ ਸੁਹਾਗਣ ਦੇ ਮੱਥੇ ਦੀ ਬਿੰਦੀ ਹੋ ਜਾਂਦੇ ਹਨ
ਕੋਈ ਉਸ ਰਾਹ ਦੀ ਪੁੱਛ ਤਾਂ ਦੇਵੇ
ਜਿੱਥੋਂ ਲੰਘਦਿਆਂ ਕੁਸੈਲਾ ਜਿਹਾ ਬੀਜ
ਗੁਲਾਬੀ ਫੁੱਲ ਹੋ ਜਾਂਦਾ ਹੈ
ਤੇ ਫੁੱਲ
ਸ਼ਹਿਦ ਬਣ ਕੇ ਤਿੱਪ-ਤਿੱਪ ਚੋਣ ਲੱਗ ਜਾਂਦਾ ਹੈ
ਕੋਈ ਉਸ ਡੰਡੀ ਬਾਰੇ ਕੁਝ ਤਾਂ ਦੱਸੇ
ਜਿਸ 'ਤੇ ਤੁਰਦਿਆਂ
ਸ਼ਹਿਤੂਤੀ ਪੱਤੇ ਢਿੱਡ ਦਾ ਸਬਰ ਹੋ ਜਾਂਦੇ ਨੇ
ਤੇ ਤਾਰਾਂ
ਰੇਸ਼ਮ ਬਣ ਕੇ ਜ਼ਿੰਦਗੀ ਦਾ ਨੰਗੇਜ ਕ'ਜਦੀਆਂ ਨੇ
ਕੋਈ ਉਸ ਰਾਹ ਬਾਰੇ ਕੁਝ ਤਾਂ ਦੱਸੇ
ਜਿੱਥੋਂ ਲੰਘਦਿਆਂ
ਹਥੇਲੀਆਂ ਦੀਆਂ ਲਕੀਰਾਂ
ਔਸੀਆਂ ਬਣ ਜਾਂਦੀਆਂ ਨੇ
ਤੇ ਮੁਹੱਬਤ
ਚੌਹਾਂ ਕੂੰਟਾਂ ਵਿੱਚ ਅਨਹਦ-ਨਾਦ
ਗਾਉਣ ਲੱਗ ਜਾਂਦੀ ਹੈ।
No comments:
Post a Comment