ਇਸ ਪੀੜ ਨੂੰ
ਕਿਹੜਾ ਨਾਂ ਦੇਵਾਂ ?
ਇਹਨੂੰ ਕਿਸ ਰਿਸ਼ਤੇ ਵਿੱਚ ਥਾਂ
ਦੇਵਾਂ?
ਹੈ ਸਿਖਰ ਦੁਪਹਿਰ ਤਸ਼ੱਦਦ ਦੀ
ਇਹਨੂੰ ਕਿਸ ਬੱਦਲ ਦੀ ਛਾਂ ਦੇਵਾਂ ?
ਵੰਝਲੀ ਦਾ ਜਿਹੜਾ ਵੈਰੀ ਸੀ
ਵੰਝਲੀ ਦਾ ਮਾਲਕ
ਬਣ ਬੈਠਾ
ਸਭ ਹੇਕਾਂ , ਹੂਕਾਂ
ਹੋ ਗਈਆਂ
ਉਹਨੂੰ ਕਿਉਂ ਰਾਂਝਣ ਦਾ 'ਨਾਂ' ਦੇਵਾਂ
?
ਸਭ ਬੋਟ ਅਲੂੰਏ ਟੁੱਕ ਦਿੱਤੇ
ਟੁੱਕ ਕੇ ਫਿਰ ਧੁੱਪੇ ਸੁੱਟ
ਦਿੱਤੇ
ਅਣਜੰਮੀਆਂ ਬੱਚੀਆਂ ਤੜਪਦੀਆਂ
ਮੈਂ ਕਿੱਥੋਂ
ਮਹਿਰਮ ਮਾਂ ਦੇਵਾਂ ?
ਅੱਖੀਆਂ ਦਾ ਵਣਜ ਸਹੇੜ ਲਿਆ
ਅੱਖੀਆਂ ਦੇ ਵਪਾਰੀ
ਆਏ ਨਾ
ਇਸ ਮੰਡੀ ਵਿੱਚ ਹੱਡ ਵਿਕਦੇ ਨੇ
ਦਿਲ ਦੇ ਦੇਵਾਂ,
ਜਾਂ ਨਾ ਦੇਵਾਂ ?
ਇਹ ਦਰਦ ਧੁਰਾਂ ਤੋਂ
ਸਾਡਾ ਸੀ
ਇਸ ਦਰਦ ਦੀ ਲਾਟ ਸਲਾਮਤ ਹੈ
ਇਹ ਸੇਕ ਵੀ ਹੈ ਇਹ ਚਾਨਣ ਵੀ
ਉਹ 'ਨਾਂਹ' ਦੇਵੇ ਮੈਂ 'ਹਾਂ' ਦੇਵਾਂ
ਰੇਤੇ ਨੇ ਪਾਣੀ ਜੀਰ ਲਏ
ਨੈਣਾਂ ਵਿੱਚ ਨਦੀਆਂ ਆ ਗਈਆਂ
ਦਿਸਹੱਦੇ ਤੱਕ ਹੈ ਮਾਰੂਥਲ
ਮੈਂ ਕਿੱਥੋਂ ਕੋਈ ਝਨਾਂ ਦੇਵਾਂ?
ਇਸ ਪੀੜ ਨੂੰ
ਕਿਹੜਾ ਨਾਂ ਦੇਵਾਂ ?
ਇਹਨੂੰ ਕਿਸ ਰਿਸ਼ਤੇ ਵਿੱਚ ਥਾਂ
ਦੇਵਾਂ?
ਹੈ ਸਿਖਰ ਦੁਪਹਿਰ ਤਸ਼ੱਦਦ ਦੀ
ਇਹਨੂੰ ਕਿਸ ਬੱਦਲ
ਦੀ ਛਾਂ ਦੇਵਾਂ?
No comments:
Post a Comment