ਲਹਿਰਾ ਲਹਿਰਾ ਕੇ ਗਾਉਂਦੀ ਗੁਲਾਬੀ ਚੁੰਨੀ ਨੂੰ
ਕਾਮੀ-ਪੈਰਾਂ ਹੇਠਾਂ ਮਧੋਲਣ ਤੋਂ ਪਹਿਲਾਂ
ਜ਼ਰਾ ਇਹ ਤਾਂ ਸੋਚੋ!
ਚੁੰਨੀਆਂ ਧੀਆਂ ਵਰਗੀਆਂ ਹੁੰਦੀਆਂ ਨੇ
ਤੇ ਧੀਆਂ ਚੁੰਨੀਆਂ ਵਰਗੀਆਂ ਹੁੰਦੀਆਂ ਨੇ
ਚਟਖ-ਚਟਖ ਕੇ ਡੁੱਲ੍ਹਦੀ ਕੇਸਰੀ ਮਹਿਕ ਨੂੰ
ਬਜ਼ਾਰੀ-ਸ਼ੀਸ਼ੇ ਵਿੱਚ ਉਤਾਰਨ ਤੋਂ ਪਹਿਲਾਂ
ਜ਼ਰਾ ਇਹ ਤਾਂ ਸੋਚੋ!
ਮਹਿਕਾਂ ਧੀਆਂ ਵਰਗੀਆਂ ਹੁੰਦੀਆਂ ਨੇ
ਤੇ ਧੀਆਂ ਮਹਿਕਾਂ ਵਰਗੀਆਂ ਹੁੰਦੀਆਂ ਨੇ
ਠੁਮਕ-ਠੁਮਕ ਕੇ ਦਾਣੇ ਚੁਗਦੀ ਅੱਲ੍ਹੜ ਘੁੱਗੀ ਨੂੰ
ਕਪਟ-ਫਾਹੀਆਂ ਲਾਉਣ ਤੋਂ ਪਹਿਲਾਂ
ਜ਼ਰਾ ਇਹ ਤਾਂ ਸੋਚੋ!
ਘੁੱਗੀਆਂ ਧੀਆਂ ਵਰਗੀਆਂ ਹੁੰਦੀਆਂ ਨੇ
ਤੇ ਧੀਆਂ ਘੁੱਗੀਆਂ ਵਰਗੀਆਂ ਹੁੰਦੀਆਂ ਨੇ
ਮਟਕ-ਮਟਕ ਕੇ ਤੁਰਦੀ ਸਜ-ਵਿਆਹੀ ਨੂੰਹ ਨੂੰ
ਅਗਨ-ਭੱਠੀ ਵਿੱਚ ਸੁੱਟਣ ਤੋਂ ਪਹਿਲਾਂ
ਜ਼ਰਾ ਇਹ ਤਾਂ ਸੋਚੋ!
ਨੂੰਹਾਂ ਧੀਆਂ ਵਰਗੀਆਂ ਹੁੰਦੀਆਂ ਨੇ
ਤੇ ਧੀਆਂ ਵੀ ਕਿਸੇ ਦੀਆਂ ਨੂੰਹਾਂ ਹੁੰਦੀਆਂ ਨੇ1
No comments:
Post a Comment