ਆਇਐ ਹਨ੍ਹੇਰਾ ਸਾਹਮਣੇ, ਜਦ ਵੀ ਤਲਾਸ਼ ਵਿੱਚ
ਬਲ ਕੇ ਮੈਂ ਜੁਗਨੂੰ ਹੋ ਗਈ , ਉੱਡੀ ਆਕਾਸ਼ ਵਿੱਚ
ਨਜ਼ਰਾਂ 'ਚ, ਹੋਂਠਾਂ ਵਿੱਚ , ਮੇਰੇ ਹਰ ਸੁਆਸ ਵਿੱਚ
ਸ਼ਾਮਿਲ ਹੈ ਉਹਦੀ ਚਾਸ਼ਨੀ , ਮੇਰੀ ਮਿਠਾਸ ਵਿੱਚ
ਉਹਦੀ ਨਜ਼ਰ ਜੇ ਆਏ, ਤਾਂ ਵਾਪਿਸ ਨਾ ਜਾ ਸਕੇ
ਸਖੀਓ!ਮੈਂ ਕੀ ਕੀ ਜੜ ਲਵਾਂ ਆਪਣੇ ਲਿਬਾਸ ਵਿੱਚ
ਨਦੀਆਂ ਨੂੰ ਡੀਕਿਐ , ਕਦੀ ਰੇਤੇ ਨੂੰ ਚੂਸਿਐ
ਆਏ ਨੇ ਉਹ ਮੁਕਾਮ ਵੀ ਮੇਰੀ ਪਿਆਸ ਵਿੱਚ
ਮੈਂ ਉਹਦੀ ਬੰਸਰੀ ਦਿਆਂ ਪੋਰਾਂ 'ਚ ਲੁਕ ਗਈ
ਉਹ ਮੈਨੂੰ ਭਾਲਦਾ ਰਿਹਾ ,ਗੋਕਲ ਦੀ ਰਾਸ ਵਿੱਚ
ਸ਼ਾਇਰ ਬਣਨਗੇ, ਜਾਂ ਕਿਤੇ ਮਹਿਬੂਬ ਬਣਨਗੇ
ਜਿੰਨੇ ਵੀ ਲੋਕ ਮਰ ਗਏ, ਮੌਸਮ ਉਦਾਸ ਵਿੱਚ
ਰਾਤੀਂ ਤੁਸੀਂ ਝੂਮੇ ਸੀ, ਜਿਸ ਛਣਕਾਰ ਨੂੰ ਸੁਣਕੇ
ਛਣਕੇ ਸੀ ਉਹ ਅੱਥਰੂ ਮੇਰੇ, ਕੱਚ ਦੇ ਗਲਾਸ ਵਿੱਚ
No comments:
Post a Comment